Մասիսի համայնքապետ Դավիթ Համբարձումյանի հրավերով այսօր Առնո Բաբաջանյանի անվան երաժշտական դպրոցի դահլիճում էին հավաքվել Մասիսի տարբեր բնակավայրերից Արցախյան պատերազմներում անմահացածների ծնողները, կանայք, հարազատները: Ողջունելով ներկաներին՝ Մասիս համայնքի ղեկավարը նշեց, որ հանդիպման նպատակը միմյանց հետ ծանոթանալն է, ինչպես նաև մի շարք հարցերի քննարկումը: Դ. Համբարձումյանը տեղեկացրեց, որ ձևավորվելու է համայնքի ղեկավարին կից խորհուրդ, որը կզբաղվի Արցախյան պատերազմներում անմահացածների, վիրավորվածների ընտանիքների խնդիրներով, ինչպես նաև ի հիշատակ անմահացածների՝ կառուցվելու է թանգարան: Ներկաները ողջունեցին ինչպես խորհրդի ձևավորման, այնպես էլ թանգարանի կառուցման գաղափարը և կարևորեցին այն հանգամանքը, որ իրենք անտեսված ու մոռացված չեն։ Դ. Համբարձումյանը պատասխանեց հնչեցված հարցերին ու վստահեցրեց, որ նմանատիպ հանդիպումները կկրեն պարբերական բնույթ։
